Flirting 101 o Flirting 911? (Lalandi ka pa ba?)

“Girl!!!“, biglang chinat ko ang close friend ko.

“Omgeeeee. Tignan mo to! Nilalandi niya ba ako? Or naglalandian kami?  Baka paranoid lang ako? Sabihin mo na sa akin kung friendly lang ah!” sabay copy+paste ng conversation sa chat box.

Eto ang reply ng kaibigan ko. “Landiiiii”.

Uh-oh. Oops. Confirmed. Nanlaki ang mata ko. Tumigil at nanatiling nakalapat ang mga daliri ko sa keyboard. Biglang nag red-alert ang utak ko.  “Hala! Pano na? Ano na ang ire-reply ko? Makiki-ride na ba ako? Do I make landi back? Or deadma? Ahhhhhhhhhhh!”

Bakit nga ba nakakatakot makipag-flirt? Sa mga hindi masyadong malakas ang loob at in doubt sa kanilang seducing powers, bakit mas madaling isa-isahin ang mga pangalan ng mga pulitikong nakikipaglandian sa kaban ng bayan? Sa mga hindi pro, mga first-timers at pati sa introvert, bakit mas gusto ko pang suminghot ng polusyon sa mga humaharurot na jip at bus sa Maynila? Ewan ko ba, pero katulad ng iba, ako rin natataranta.

Kaya naman naghanda ako ng points kung bakit scary ang flirting - WORST CASE SCENARIOS.

Unang-una, katakot-takot na tsismis ang maaring kumalat. Mga tsismis na nagsisismula sa “Omaygash, alam mo ba? This is so juicy! Si ganito inaano si ganyan..” . Nako mas mabilis atang umarangkada ito kaysa sa jet plane.  Syempre, paano kung di pala trust-worthy ang ka-landian mo? Minsan lang na nagkainisan or hindi nagkamabutihan eh kung anu-ano na ang sinabi niya tungkol sa’yo. Pano na lang ang ibang prospect mo? Mamaya ma- turn off na dahil sa mga kababalaghan (at di naman pala totoo, bitter lang ang ex-kalandian mo) na narinig nila. Ang masaklap pa, kadalasan may iba’t-ibang version ang tsismis. Malamang ang mga version na yun ay pa-grabe-han pa. The bigger, juicer, wider, deeper, louder, the better! Uhh, the tsismis that is. (no ‘double meanings’ intended)

Pangalawa, minsan ang dapat na two-way communication ay nagiging one-way. Parang kalye lang rin yan, akala mo salubungan. Yun pala one-way ang napasukan mong eskinita. Hala, ariba ka ng ariba! Natayuan na kasi ng mga informal settlers ang kabilang kalye ng mga bahay na gulanit. Eto yung feeling na nakakainis, akala mo okay na. Nag-click na kayo! Sa loob-loob mo, onting push na lang, everything is going well. Sabi mo pa sa mga close friends mo, (pero sa totoo ay tini-tweet mo na to) “Kami na! Malapit na!”. Araw-gabi kang nakikining sa radyo, namimili na ng inyong couple song at pinagtatawanan ang ibang callers ni Papa Jack, dahil buti ka pa success story na! Handang-handa ka na rin palitan ng ‘in a relationship’ ang Facebook status mo. Ang saya mo na talaga, finally may love-life ka na, hallelujah!

Tapos biglang *poof*. ANYARE? Ha? Di mo alam? Well, mas lalong di ko alam! Basta akala mo yun na, di naman pala. Clue: Baka naman mayroon ka palang ka-kompetensiya at ang bruhang sugo ng kalandian ay gumamit na ng gayuma. Sorry girl, nag-expect ka pa.

Lastly, threesome or worse gang bang.  (applicable for virtual flirtations e.g. text and/or chat. Basta yung hindi kayo magkaharap or nagkikita)

          Unahin natin ang threesome, let’s say natutunaw ka na sa uber-kilig lines niya, pumi-pick up lines pa! Mayroon din pamatay na one liner, parang galing lang sa pelikula. This is it. Sige, edi gagantihan mo rin ng mga ultra-flirtatious words, pa-cute and sweet pa ang tone at syempre di mo nakalimutang magpaulan ng smiley at heart emoticons. Para sa gabing ito (or sige extended version) at sa mga susunod pang gabi ay matutulog ka ng naka-smile. Naka-smile habang nagsusuklay, bigla biglang kinikilig na parang epileptic. Pero isang araw, magigising ka din sa kahibangan mo dahil unti-unti mong mapapansin, dalawang indibidwal na ang ngumingiti sa’yo. Hindi lang ang ‘someone’ mo, maari din namang pati ang kaibigan niya, ang laging kadikit na kaibigan. Eh isa lang kamo ang katext/kachat mo? Kala mo lang yun.  Kaya pala yung mga sinasabi mo sa ‘someone’ mo, alam din nung kaibigan niya walang bawas walang kulang. Akala mo, baka shinare niya lang. Medyo huli mo na nang matunugan, na si ‘kaibigan’ witness pala sa lahat, or worse participant din ng lovely discussions niyo. Creepy much?

Para naman sa Gang Bang, yung isang text mo, todo tipid! Parang ‘GM’ (group message) sa buong tropa. Depende ang bilis ng reply sa laki ng grupo. Pag more than 10, pasenya sa paghihintay. Syemre pinapasa-pasa pa yung cellphone at saka mag-iisip ang 10 o higit pang katao para sa 1 reply sa’yo. Pwedeng mauna pang humapo ang hanggang bewang na baha sa maduming estero, matapos ang sangkaterbang komersyal sa teleserye pag gabi. Dito nae-exercise ang kasabihan na “more heads are better than one”.

Isipin mo na lang may kausap na Lernaean Hydra (yung serpent/dragon-like monster na bumubuga ng apoy sa Greek mythology at kapag pinutol mo ang isang ulo, 2 ulo pa ang tutubo muli). Paano mo naman malalaman kung Hydra na pala ang ka-flirtan mo? Malamang may front ang grupo, siya ang alam mong kausap mo, pero pag nagkita kayo sa personal magdalawang-isip ka na kung buong barkada niya ang nanunukso ng sabay-sabay. Well, malay nga naman natin baka sadyang tinutukso lang talaga nila kayo. Kaya eto, pag more than one sa kanila ang nagbanggit o nagbitiw ng mga linya mula sa virtual conversations niyo, patay na. Tipong, naghihiritan na sila ng mga akala mong personal landi words niyo tas sabay tatawa. Nako, girl. Katulad ng pagpatay sa Hydra, dapat hindi pinuputol ang ulo, stab the heart, friend! The heart! Puntiryahin mo yung dummy nila, gilingin mo at para mamatay na rin ang mga iba pang ulo.

Minsan malinis na katuwaan, pero meron din na pustahan. Basta, ingat lang, Swerte ka na lang kung may nagkagusto nga talaga sa’yo at tinuloy ang paglalandi niya. Yun nga lang, ilan na ang naka-witness ng history niyong dalawa. Ang dami na. Awkward.

Special situation: Feelingero/ feelingera/assumingero/assumingera

Okay, ganito ang scenario, hindi ka nag-aatempt na manlandi in any way. Period.

 Eto yung mga panahon na may kailangan ka lang talaga. Kakausapin mo siya 'out of nowhere', pasmile-smile, with matching greeting pa. Kahit i-kiss mo pa siya sa cheek at bigyan ng free hug, i-libre ng milk tea o kahit pa masahihin mo siya. Susuyu-suyuin mo, lalambingin at magpapa-cute.

Basta sagutan niya lang yung survey na to para sa thesis mo o turuan ka lang niya ng statistics/ calculus. Pwede rin magmakaawa ka na nang nakaluhod, pahiramin ka lang talaga ng scientific calculator dahil may exam ka mamayang hapon. In short, desperado ka na talaga.

Kapag chinat, gusto na agad? Di’ba pwdeng magpapa-like lang ng page o picture? Tinabihan mo sa classroom, pinopormahan na agad? Di’ba pwedeng manghihingi lang ng pagkain o mangongopya? Masyado kasing mataas ang excitement ng iba, tsumitsismis na agad ng “kung maka-dikit nga sa akin eh”. Eto ang mga masarap sigawan ng “Ewwww, hindi kaya kita type! Kaphhhhhaaaaaaal.”

Naghihintay na ng reply ang ka-chat ko. Sasagutin ko ba? 

           Fine, sige. Bahala na.

Ipagdadasal ko na lang na iba ang senaryo namin, na iba ang daang tatahakin, wag din sana sa one-way na eskinita o sa Edsa at lalong-lalo wag sana sa rotonda.