Dapat sa Resume..

 Resume.

Lahat ng kaklase ko ay natataranta rito ngayon.

Kailangang hasain namin ang VIP pass at winning lotto ticket na ifoforward sa kung ano-anong kumpanya. Maliban sa grades/report card, resume pa ang isang dapat pagkaabalahan.

Ehhhh, paano na ‘pag wala kang maisulat? Halaaaaa?

Sana pwede ring isulat sa CV/resume lahat ng inaplayan na hindi ako natanggap. Sa malamang 5 pahina na ang dokumento ko. Hindi ba pwedeng isulat sa experience ‘yun? Kung maari rin sanang ilagay lahat ng contest na sinalihan, hindi lang nga nasabitan ng medalya o nabigyan ng tropeo.

Lalo na noong elementary at high school,

n    Participant, Spelling Quiz Bee (wala na talaga kasing mapiling iba)

n    Essayist, Essay writing contest (forfeit na lahat ng matatalino, dahil nanalo na)

Sa college level, eto naman ang kadalasang dinaranas ng mga estudyante,

n    Applicant, Mga pa-importanteng-tao-kala-mo-sino Organization

n    Interviewee, Kung-di-ka-magaling-di-ka-katulad-namin Association

n    Exam taker, Litsugas-san-ko-ba-to-gagamitin Qualifiers Exam

Sa resume kasi, walang espasyo para sa lahat ng pagsubok. Hindi makikita kung sino ang pursigido at pilit naghahanap ng grupo/kumpanya na tatanggap at yayakap sa kung anong meron siya. Ang tanging nakikita lamang o ang gusto lang makita ay ang tagumpay. Totoo man o hindi, may daya man o wala, may connection man o sariling sikap, pinagpaguran o natsamabahan. Basta may certificate, medal o trophy, pwede nang idagdag sa CV.

Mailalagay ba ang 2 o 3 oras na tulog dahil pinagpuyatan mo ang pag-aaral? Ang plate number ng jeep, fx o bus na natuluan mo ng laway? Kung ilang gimmick ang pinalagpas dahil may darating na exam o kinailangan mong bantayan ang mga kapatid sa mumunting bahay? Ang lamang pera ng wallet na napulot at isinauli kahit ang lunch mo lang ay candy? Kung gaano mo nami-miss ang OFW na tatay/nanay na nagpapakahirap para sa iyong tuition? Kung para kanino ka bumabangon? Ano ang pangarap mo, na gagawin mo ang lahat, huwag lang itong mapako?

Bawal kasi haluuan ng personal life ang trabaho. Tangna. Ang personal, psychological at social disposition mo nga ang makakapekto sa kung maganda o pangit ang trabaho (lalo na ang ugali) mo.

Pero naglalaan tayo ng lugar at pumuputol ng puno para sa BIG words at mahahanging talento-kuno na hindi naman mapatunayan. Paano naman ang mga realizations, values at wisdom?  Kadalasan kasi, ang mga nakasulat sa resume ay pakitang-tao lamang, achievements ekek, mga binayarang registration fee pero walang pinuntahang org meetings.

Masyadong mapili ang mga tao ngayon, dapat nakakamit ka ng ganito – ganyan, kailangan 1^st-3^rd prize lang. Aba. Bakit ba kasi nilagyan ng konkretong sukatan ang pagiging magaling? Ang kagalingan ba may konkretong sukat din?

Kaya kung magkakaroon ako ng kompanya, secondary requirement ko lang ang resume. Gusto kong masiguro na pantay-pantay ang tsansa ng lahat, kaya papapilahin ko ang mga gustong mag-apply para sumagot ng ala-‘slumbook’ at quiz bee na exam. Heto ang aking naisip, habang naty-type sa fire exit ng aking dorm.

___________________________________________________________________________

Sagutin ang mga sumusunod. Kahit tag-lish, mala-literaturang Filipino o pa-conyong Ingles ang sagot, basta naiintindihan ko, okay lang.  Bawal ang magtanong sa katabi, kay Papa God pwede.

n    Kamatis. Fruit o vegetable? Discuss.

n    Pang-ilang presidente si Pnoy? Convince me.

n    Maliban sa pagku-kompyuter, ano pang ginagawa mo sa iyong free time? Illustrate.

n    Ano ang pinakamasarap na tinapay ang natikman mo? Magkano at saan ko ito mabibili?

n    Saang lugar ang isang beses mong napuntahan, sobrang ikinatuwa mo, pero ayaw mo nang balikan? Bakit? (na-harass ka ba?)

n    Maliban sa ‘time is gold’, ‘the glass is half full’ at ‘just do it’ na quotes, ano pa ang mga kasabihan ang paulit-ulit mong rinerecite sa sarili kapag pinanghihinaan ka ng loob? Lalo na kapag umiiri ka sa banyo?

n    Sa tignin mo, bakit kulay puti halos lahat ng inidoro? Masaya ka ba rito?

n    Die-hard fan ka ba ni Aling Dionisia?  Kung hindi, isulat ang lahat ng numero na sumunod sa 3.14 o p? 

Essay: Puwede bang pang-MMK ang buhay mo? Anyare in your life ateh/kuyah? Kung oo, bakit kita dapat kuhaning intern sa kumpanya ko? Kung hindi, bakit kita dapat kuhaning intern sa kumpanya ko? (3 paragraphs, sa 1^st paragraph lang pwede magsinungaling.)

Bonus (50 pts): Isulat ang lyrics ng super naka-LSS na jingle ni Manny Villar noong huling eleksyon.

(o kinakanta mo talaga? Eh bonus na nga eh, ba’t nage-effort ka pa? buwaahahahihi)

Last na: Ipasa sa akin ang papel ng may malaking ngiti. Tas ibulong sa aking kanang tainga, kung saan naganap ang first-ever date mo. (Legal man o hindi)

___________________________________________________________________________

Pwede nilang tarantaduhing pabalik ang mga tanong. Ano namang masama sa kakaiba, basta ba productive at maganda?  Mayroon kasing matalinong kagaguhan na hindi kailanman matatawaran ng uno o tres. Makating isip na hindi maisusulat sa transcript. (Make sure lang na ikaw ay mabait)

Pero baka maidemanda naman ako rito dahil walang ‘formality’ o ‘process’ ang hiring system ko. Masasabihang bias, walang credibility dahil walang basis ng educational attainment at extra-curricular achievement. Kawawa naman ang kumpanyang nasa isip ko pa lang,  binubuwag na.

Ngayon tuloy, libo-libong teenagers ang natataranta, naiinis at nagkukumahog ng maisusulat sa papel. Nanampalataya at umaasang heto ang sagot sa mas magandang kinabukasan na magiging highway na daan para matanggap sa trabaho, at para sa akin, OJT.